സ്പാനിഷ് ലാ ലീഗയില്‍ വമ്പന്‍ വിജയവുമായി ബാഴ്‌സലോണ. വിയ്യാറയലിനെ ഒന്നിനെതിരെ അഞ്ച് ഗോളുകള്‍ക്കാണ് ബാഴ്‌സ തകര്‍ത്തത്. ബാഴ്‌സയ്ക്ക് വേണ്ടി റോബര്‍ട്ട് ലെവന്‍ഡോവ്‌സ്‌കിയും റാഫീഞ്ഞയും ഇരട്ടഗോളുകളുമായി തിളങ്ങി.
🔥 FULL TIME!!!!! 🔥#VillarrealBarça pic.twitter.com/vrKVl5muiB
വിയ്യാറയലിന്റെ തട്ടകത്തില്‍ നടന്ന മത്സരത്തില്‍ സമ്പൂര്‍ണ ആധിപത്യം പുലര്‍ത്താന്‍ ബാഴ്‌സയ്ക്ക് സാധിച്ചു. 20-ാം മിനിറ്റില്‍ ലെവന്‍ഡോവ്‌സ്‌കിയാണ് ബാഴ്‌സയുടെ ഗോള്‍വേട്ടയ്ക്ക് തുടക്കമിട്ടത്. 15 മിനിറ്റിന് ശേഷം ലെവന്‍ഡോവ്‌സ്‌കി തന്നെ ബാഴ്‌സയുടെ ലീഡ് ഇരട്ടിയാക്കി. ലാമിന്‍ യമാലിന്റെ ക്രോസില്‍നിന്ന് ഓവര്‍ഹെഡ് ഹെഡറിലൂടെയാണ് ലെവന്‍ഡോവ്‌സ്‌കി ഗോള്‍ കണ്ടെത്തിയത്.
രണ്ടാം ഗോള്‍ വഴങ്ങി മൂന്ന് മിനിറ്റിനുശേഷം വിയ്യാറയല്‍ തിരിച്ചടിച്ചു. 38-ാം മിനിറ്റില്‍ അയോസെ പെരെസ് ബാഴ്‌സയുടെ വലകുലുക്കിയെങ്കിലും അത് വിയ്യാറയലിന്റെ ആശ്വാസ ഗോള്‍ മാത്രമായി മാറുകയായിരുന്നു. 58-ാം മിനിറ്റില്‍ പാബ്ലോ ടോറെയിലൂടെ ബാഴ്‌സ മൂന്നാം ഗോളും കണ്ടെത്തിയതോടെ വിയ്യാറയല്‍ ഏറെക്കുറെ പരാജയത്തോട് അടുത്തു. പിന്നാലെ 74,83 മിനിറ്റുകളില്‍ റഫീഞ്ഞ നേടിയ ഗോളിലൂടെ ബാഴ്‌സ വിജയം പൂര്‍ത്തിയാക്കി.